Sicilia bedda

Sabatu sira Diu livàu manu stancu, ccu 'nduluri nnì lu schinu, ca ppi criari l'universu sanu ci travagghiàu se' jorna di cuntinu. Lesta 'na nuvula si furmàu divanu, 'na stidda si uffrìu ppi cuscinu, 'u suli misi 'a cuperta di Buranu 'a luna un linzuleddu mistu linu; lu ventu fa la vuci di supranu, lu mari sona duci 'u minnulinu l'arcubalenu 'ntona 'u marranzanu 'a terra fa di prima ccu viulinu e poi tutti 'nsemi chianu chianu càntunu 'a ninna nanna a lu Divinu ca ppi dda vota comu n'èssiri umanu durmìu tutta la notti a sonnu chinu. Appena si risvigghia a lu matinu ci parsi ch'ava fattu 'nsognu stranu 'ncumincia a taliàri ddà vicinu e in ogni locu 'ndi li munnu sanu: c'era 'npuntinu 'nmenzu di lu mari ca sulu Iddu lu putìa vidìri ddu sognu 'ncuminciàu a divintari 'na terra china 'i ciuri a nun finìri sintènnu ddi cchiù raffinati oduri l'Onniputenti nun sapìa chi diri, taliàva tutti 'nsemi ddi culuri maravigghiatu circava di capiri: chi paradisu! Fu chiddu ca pinzàu, nun pari veru a mia ca sugnu Diu; ci fici 'na carizza e la vasàu ccu l'acqua di lu mari 'a binidiu. Poi dissi: Sicilia, iu ti salutu, sugnu cuntentu ca t'haju criatu, puru ca resti sula e senza ajutu sacciu ca nu' spricaju lu me ciatu, a vui ca di sta terra figghi siti, vi raccumannu, nun la ruvinati! Gudìtivilla mentri cci l'avìti. Nautra matri? No... nun la truvati.