Un semplici salutu

Ogni jornu ppi jiri a travagghiari fazzu sempri 'na strata e quannu tornu, sutta n'arvulu misu a friscurata c'è 'nu vaccaru ccu quattru cani attornu. Aspetta a mia! Sta ccu l'occhi a la via attentu a nun sbagghiari, già si teni prontu di luntanu ca iu ci sonu primu di passari e poi cci fazzu 'u salutu ccu la manu, Iddu mi ridi e mi saluta macari poi mi talìa mentri m'alluntanu. E dd'omu senza età ca pari 'nvecchiu sta fermu ddà ccu la sacchina 'ncoddu mentri iu lu vidu 'ndi lu retruspecchiu ccu 'a manu jisata finu ca tracoddu. Ogni vota, mi sentu l'alma scunsulata pirchì...pirchì lu penzu ddà, sulu suliddu e ppi 'npezzu di strata, "viaggiu" assemi a iddu. All'atru jornu mi fici scantari pirchì... nu' visti ddà ca m'aspittava, mi parsi stranu, vosi rallintari c'era quarcosa ca nu' mi quadrava: era dda 'nterra tuttu arrutulatu ccu 'npezzu 'i pani menzu muzzicatu e ddi canuzzi misi a lu so latu. Mi parsi mortu, d'istintu mi firmaju, scinniju currennu pigghiatu du scunfortu lu chiamaju: vaccaru, vaccaru! Nun sapìva 'u so nomu, lu tuccaju, Iddu si scumpunìu e mi desi 'a vuci, si stricàu l'occhi e dissi: chi succidìu, già è l'ura? Oh quantu sugnu strammatu mi durmiju! Lu pirdunati stu vicchiareddu ingratu sì a lu salutu nun vi rispunniju? Sapìti? Tanti voti ccu 'i vacchi mi trovu luntanu ma quannu arriva l'ura 'ncuminciu a sintìrimi stranu lassu pèrdiri ogni cosa e ccu primura... ...curru e v'aspettu ccà! Pirchì ccu ddu salutu e dda sunata passu cuntentu 'u restu da jurnata. Iu lu scutaju comu 'nzalanutu e 'ndi lu cori 'ntisi 'na vampata poi ci dissi a dd'omu assai patutu: ma nun è curpa vostra, 'a curpa è mia! Pirchì oggi passaju cchiù prestu! E ccu dda semplici bugìa 'u fici cuntentu e lu lassaju, poi in segnu di salutu ci sunaju! Iddu ridìu menzu strabbudutu, iu mi fici 'a cruci e suspiraju!