Aci e galatea

Misu ‘nda ‘npuntu ca talìa lu mari, d’unni spunta lu suli a lu matinu, c’è ‘npaiseddu di biddizzi rari c’adura di ginestra e gelsuminu. È ‘ncastunatu ‘nmenzu di la sciàra cumu fussi ‘ndu quadru pitturatu, ccu piscaturi ‘a varca e la lampara e di ottu faragghiùni circundatu. Discìnni ‘u nomu so d’un picuraru ca di la genti, Aci era chiamatu, si cunta, ca pajàu ‘nprezzu caru ppi curpa d’un giganti scillaratu. Aci, ‘npicciuteddu tuttu arduri, di Galatea s’avìa ‘nnamuratu, c’hera ‘na Ninfa di granni splinnuri e d’Idda era puru ricambiatu. Ma Polifemu, ciclopi priputenti, pur’Iddu ppi dda Ninfa avìa pritisi, la gilusia cci ‘nfruscàu la menti e la viulenza so, fici palisi. Senza difisa, Aci, tempu nenti di ddu giganti vinni massacratu, ca l’ammazzàu senza pintimenti e lu lassàu dda ‘nterra dissanguatu. Vidènnu chissu, Nereo, Diu marinu, di pena ppi la figghia si pigghiàu, datu ca di l’Olimpu era un Divinu, lestu ddu sangu, in ciumi trasfurmàu. Essènnu un ciumi, Aci, la so strata ‘a fici scinnènnu versu ‘u mari, unni è ca c’era la so ‘nnamurata ccu li capiddi sciòti ad aspittari; Galatea, scurdànnisi ‘u duluri, ‘ntrizzàu ‘i capiddi e ccu tinirizza, li desi a Aci, in segnu du so amuri e lu chiamàu ppi sempri, Acitrizza.