Oh terra matri

– Oh terra matri quali gran duluri ti tocca eternamenti suppurtari. Chi mali ha fattu, terra di li ciuri gemma priziùsa ‘nmenzu di lu mari? – Figghiuzzu miu, tutti li me’ svinturi li chianciu cu li lacrimi chiù amari, sù comu spini assai pungenti e duri, firiti funni, tinti di sanari; fatti di certi figghi, tradituri, cuntenti di sintìrimi bramari senza pruvari pena e né puduri. Nichi nicuzzi, li vosi addivari ‘nmenzu ‘a ducizza, ‘nmenzu di l’amuri: ‘na matri ‘un cridi mai di si sbagghiari!