La Casta

Oh quantu sciàlu, quanta cuntintizza e quantu vucchi ca fannu scumazza, cu a la pignata so, lu focu attizza, cu fa la vuci grossa e cu minazza. Si vidi di luntanu ché fintizza, dda risatedda ca lu labbru strazza, ‘ntu mentri la so menti cuvatizza, penza ‘a putruna cu li posa vrazza. Chi ci ‘ntaressa siddu c’è strittizza o pi virgogna genti ca s’ammazza e vecchi ca riscèdunu ‘a munnizza? Iddi sunnu la casta, e di chi razza! “Custritti” a stari ‘nmenzu la ricchizza: a l’atri? Basta ‘u pani cu ‘a sputazza!